ನಾಗಗೊಂಡನಹಳ್ಳಿ ಸಮೀಪ ಶ್ರೀ ಚಲುಮೇರುದ್ರಸ್ವಾಮಿ ಬ್ರಹ್ಮರಥೋತ್ಸವಕ್ಕೆ ಸಕಲ ಸಿದ್ಧತೆ

ಚಳ್ಳಕೆರೆ: ನಾಗಗೊಂಡನಹಳ್ಳಿ ಸಮೀಪ ಶ್ರೀ ಚಲುಮೇರುದ್ರಸ್ವಾಮಿ ಬ್ರಹ್ಮರಥೋತ್ಸವಕ್ಕೆ ಸಕಲ ಸಿದ್ಧತೆ
ಚಿತ್ರದುರ್ಗ ಜಿಲ್ಲೆ ಚಳ್ಳಕೆರೆ ತಾಲ್ಲೂಕಿನ ನಾಗಗೊಂಡನಹಳ್ಳಿ ಸಮೀಪದಲ್ಲಿರುವ, ಶ್ರೀ ಮುರುಘರಾಜೇಂದ್ರ ಬೃಹನ್ಮಠದ ಅಧಿಕಾರ ಹಾಗೂ ಆಡಳಿತಕ್ಕೆ ಒಳಪಟ್ಟಿರುವ ಶ್ರೀ ಚಲುಮೇರುದ್ರಸ್ವಾಮಿ ಬ್ರಹ್ಮರಥೋತ್ಸವವು ದಿನಾಂಕ 28-01-2026ರ ಬುಧವಾರ ವಿಜೃಂಭಣೆಯಿಂದ ನಡೆಯಲಿದೆ.
ಈ ಧಾರ್ಮಿಕ ಮಹೋತ್ಸವದ ಅಂಗವಾಗಿ ಗ್ರಾಮ ಪಂಚಾಯಿತಿ ಹಾಗೂ ದೇವಸ್ಥಾನ ಕಮಿಟಿ ವತಿಯಿಂದ ಸಕಲ ಸಿದ್ಧತೆಗಳನ್ನು ಪೂರ್ಣಗೊಳಿಸಲಾಗಿದೆ.
ಜನವರಿ 29 ರಂದು ಹೂವಿನ ಅಡ್ಡಪಲ್ಲಕ್ಕಿ ಉತ್ಸವ ನಡೆಯಲಿದ್ದು,

ಜನವರಿ 31 ರಂದು ಜಾತ್ರಾ ಮಹೋತ್ಸವಕ್ಕೆ ತೆರೆ ಬೀಳಲಿದೆ.
✨ ಶ್ರೀ ಚಲುಮೇರುದ್ರಸ್ವಾಮಿಯ ಐತಿಹ್ಯ
ನಾಯಕನಹಟ್ಟಿಯ ಶ್ರೀ ತಿಪ್ಪೇರುದ್ರಸ್ವಾಮಿಯಂತೆ ಪವಾಡ ಪುರುಷರಾಗಿದ್ದ ಶ್ರೀ ಚಲುಮೇರುದ್ರಸ್ವಾಮಿಯವರು, ನಾಗಗೊಂಡನಹಳ್ಳಿ ಸಮೀಪದ ವೇದಾವತಿ ನದಿಯ ದಂಡೆಯಲ್ಲಿರುವ ಈಶ್ವರ ದೇವಾಲಯದಲ್ಲಿ ಪೂಜೆ ಸಲ್ಲಿಸುತ್ತಿದ್ದರು ಎಂಬ ಐತಿಹ್ಯವಿದೆ.
ಆ ಕಾಲದಲ್ಲಿ ನದಿ ದಂಡೆಯ ಮೇಲೆ ದನಗಳನ್ನು ಮೇಯಿಸಲು ಬರುತ್ತಿದ್ದ ಬಾಲಕರು ಸ್ವಾಮಿಗೆ ಹಾಲು ನೀಡುತ್ತಿದ್ದರಂತೆ.
ಅದಕ್ಕೆ ಪ್ರತಿಯಾಗಿ ಸ್ವಾಮಿಯವರು ತಮ್ಮ ಬೆತ್ತದಿಂದ ಮರಳನ್ನು ಸ್ಪರ್ಶಿಸಿ ಪ್ರಸಾದವನ್ನಾಗಿ ಪವಾಡ ಮಾಡುತ್ತಿದ್ದರು, ಆ ಪ್ರಸಾದವನ್ನು ದನ ಕಾಯುವ ಹುಡುಗರು ಸೇವಿಸುತ್ತಿದ್ದರು ಎಂಬ ನಂಬಿಕೆ ಇದೆ.
ಈ ಪವಾಡಗಳ ಕಾರಣದಿಂದ ಸುತ್ತಮುತ್ತಲಿನ ಗ್ರಾಮಸ್ಥರು ಸ್ವಾಮಿಗೆ ವಿಶೇಷ ಪೂಜೆ ಸಲ್ಲಿಸುತ್ತಾ ಬಂದಿದ್ದಾರೆ.
ಇಂದಿಗೂ ಈ ಭಾಗದಲ್ಲಿ ಚಲ್ಮೇಶ್, ಚಲುಮಪ್ಪ, ಚಲುಮೇರುದ್ರ, ಚಲುಮಕ್ಕ ಎಂಬ ಹೆಸರನ್ನು ಇಡುವ ಸಂಪ್ರದಾಯ ಕಂಡುಬರುತ್ತದೆ.
🐍 ಜೀವಸಮಾಧಿ ಮತ್ತು ಜನಪ್ರತೀತಿ
ಶ್ರೀ ಚಲುಮೇರುದ್ರಸ್ವಾಮಿಯವರು ವೇದಾವತಿ ನದಿ ದಂಡೆಯಲ್ಲೇ ಜೀವಸಮಾಧಿಯಾಗಿದ್ದಾರೆ ಎನ್ನಲಾಗುತ್ತದೆ.
ಸಮಾಧಿ ಮೇಲೆ ದನ ಕಾಯುವವರು ದಿನನಿತ್ಯ ಹಾಲು ಇಟ್ಟು ಹೋಗುತ್ತಿದ್ದರು.
ಆ ಹಾಲನ್ನು ಸ್ವಾಮಿಯು ನಾಗರಹಾವಿನ ರೂಪದಲ್ಲಿ ಬಂದು ಕುಡಿಯುತ್ತಿದ್ದರು ಎಂಬ ಪ್ರತೀತಿ ಇಂದಿಗೂ ಹಿರಿಯರಲ್ಲಿ ಜೀವಂತವಾಗಿದೆ.
🙏 ಇಷ್ಟ ಪ್ರಸಾದ
ಶ್ರೀ ಚಲುಮೇರುದ್ರಸ್ವಾಮಿಯ ಇಷ್ಟ ಪ್ರಸಾದವಾಗಿ
ಹಸಿ ಕಡಲೆ (ಶೇಂಗಾ), ನೆನಸಿದ ಅಕ್ಕಿ, ಬೆಲ್ಲ ಹಾಗೂ ತೆಂಗಿನಕಾಯಿ
ಇಂದಿಗೂ ದೇವಸ್ಥಾನದಲ್ಲಿ ಭಕ್ತರಿಗೆ ವಿತರಿಸಲಾಗುತ್ತಿದೆ.
ಈ ಮಹೋತ್ಸವದಲ್ಲಿ ಸಾವಿರಾರು ಭಕ್ತರು ಭಾಗವಹಿಸುವ ನಿರೀಕ್ಷೆಯಿದ್ದು, ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಧಾರ್ಮಿಕ ಉತ್ಸವಕ್ಕೆ ಸಾಕ್ಷಿಯಾಗಬೇಕೆಂದು ಆಯೋಜಕರು ಮನವಿ ಮಾಡಿದ್ದಾರೆ.
— ಚಲ್ಮೇಶ್ ಎ
ಅಧ್ಯಕ್ಷರು,
ಸಿಡಿಲ ಸಂತ ಸ್ವಾಮಿ ವಿವೇಕಾನಂದ ಸಮಾಜ ಸೇವಾ ಸಂಸ್ಥೆ (ರಿ),
ಮತ್ಸಮುದ್ರ