ರಾಜ್ಯ ಮಟ್ಟದ ಮೈಂಡ್ ಸ್ಪಾರ್ಕ್ ವಿಜ್ಞಾನ ರಸಪ್ರಶ್ನೆ ಎಸ್. ನಿಜಲಿಂಗಪ್ಪ ಅಂತಾರಾಷ್ಟ್ರೀಯ ಶಾಲೆ ರಾಜ್ಯಕ್ಕೆ ಪ್ರಥಮ

ಹೊಸದುರ್ಗ:
ಚಿತ್ರದುರ್ಗದಲ್ಲಿ ಇತ್ತೀಚೆಗೆ ನಡೆದ ರಾಜ್ಯ ಮಟ್ಟದ ಮೈಂಡ್ ಸ್ಪಾರ್ಕ್ ವಿಜ್ಞಾನ ರಸಪ್ರಶ್ನೆ ಕಾರ್ಯಕ್ರಮದಲ್ಲಿ ಹೊಸದುರ್ಗದ ಎಸ್. ನಿಜಲಿಂಗಪ್ಪ ಅಂತಾರಾಷ್ಟ್ರೀಯ ಶಾಲೆಯ ವಿದ್ಯಾರ್ಥಿಗಳು ಪ್ರಥಮ ಸ್ಥಾನ ಪಡೆದು ರಾಜ್ಯಕ್ಕೆ ಮೊದಲಿಗರಾಗಿ ಹೊರಹೊಮ್ಮಿದ್ದಾರೆ.

ಈ ಸ್ಪರ್ಧೆಯಲ್ಲಿ ರಾಜ್ಯದ ವಿವಿಧ ಭಾಗಗಳಿಂದ 132 ಶಾಲೆಗಳ 300ಕ್ಕೂ ಹೆಚ್ಚು ತಂಡಗಳು ಭಾಗವಹಿಸಿದ್ದವು. ಒಟ್ಟು ಸುಮಾರು 900 ವಿದ್ಯಾರ್ಥಿಗಳು ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದರು. ವಿವಿಧ ಹಂತಗಳ ಬಳಿಕ 8 ತಂಡಗಳು ಸೆಮಿಫೈನಲ್ ಪ್ರವೇಶಿಸಿ, ಅಂತಿಮವಾಗಿ ಫೈನಲ್ ಹಂತ ತಲುಪಿದ್ದವು.
ಫೈನಲ್ ರಸಪ್ರಶ್ನೆಯಲ್ಲಿ 8 ಸುತ್ತುಗಳು ನಡೆದಿದ್ದು, ಎಸ್. ನಿಜಲಿಂಗಪ್ಪ ಶಾಲೆಯ ಸಿಬಿಎಸ್‌ಇ ವಿಭಾಗದ ವಿದ್ಯಾರ್ಥಿಗಳು ಅತ್ಯುತ್ತಮ ಉತ್ತರಗಳ ಮೂಲಕ ಗೆಲುವನ್ನು ತಮ್ಮದಾಗಿಸಿಕೊಂಡರು.
ವಿಜೇತ ತಂಡದಲ್ಲಿ 8ನೇ ತರಗತಿಯ ಲಕ್ಷ್ಮೀ ಪ್ರಸಾದ್, 9ನೇ ತರಗತಿಯ ಶ್ರಾವಣಿ ಪ್ರಕಾಶ್ ಹಾಗೂ 10ನೇ ತರಗತಿಯ ಜೀವನ್ ಆರ್ ಭಾಗವಹಿಸಿದ್ದರು.
ಈ ಸ್ಪರ್ಧೆಯನ್ನು ಆರ್ಕಾ ಸೊಲ್ಯೂಶನ್ ಮತ್ತು ಕ್ಲೌಡ್ ಟ್ಯೂಟರ್ಸ್ ಸಂಸ್ಥೆಗಳ ಸಹಯೋಗದಲ್ಲಿ ಆಯೋಜಿಸಲಾಗಿತ್ತು. ವಿದ್ಯಾರ್ಥಿಗಳ ಸಾಧನೆಗೆ ಸಂಸ್ಥೆಯ ಅಧ್ಯಕ್ಷ ಎಂ. ಶಿವಲಿಂಗಪ್ಪ, ಕಾರ್ಯದರ್ಶಿ ಕೆ.ಎಸ್. ಕಲ್ಮಠ್, ಅಕಾಡೆಮಿಕ್ ಡೈರೆಕ್ಟರ್ ಎಂ.ಬಿ. ತಿಪ್ಪೇಸ್ವಾಮಿ, ಎಲ್ಲಾ ಧರ್ಮದರ್ಶಿಗಳು ಹಾಗೂ ಪ್ರಾಂಶುಪಾಲ ಜ್ವಾಲಾ ರೋಖಡೆ ಅಭಿನಂದನೆ ಸಲ್ಲಿಸಿದ್ದಾರೆ.